ဒီဇင်ဘာ ၊ ၂၉ ၊ ၂၀၂၃
SP ( VOM)
မန္တလေးတိုင်း ၊ ချမ်းအေးသာစံမြို့ ၊ ၈၁ လမ်း ၊ ၂၈ နဲ့ ၂၉ လမ်း အကြားမှာ ဒီကနေ့ ညနေပိုင်းက ဒုရဲအုပ်မေသဥ္ဇာဝင်းပြည့်ဆိုတဲ့ အမျိုးသမီးတယောက် ပစ်သတ်ခံရတယ်လို့ နီးစပ်သူတွေဆီက သိရပါတယ်။
” အမှတ် ၈ ရဲစခန်းက အမှုစစ် ရဲအရာရှိ တာဝန်ထမ်းဆောင်နေတဲ့ ရဲမေ တယောက် ပစ်ခံရတယ် ၊ သူက ရဲစခန်းကနေ နေအိမ်အပြန် လမ်းမှာ ပစ်ခံရတာဖြစ်လို့ နေရာမှာတင် ပွဲချင်းပြီး သေတယ် ” လို့ ရဲစခန်းနဲ့ နီးစပ်သူတယောက်က ပြောပါတယ်။
အဲ့ဒီဖြစ်စဥ်နဲ့ ပတ်သက်ပြီး မန္တလေးတိုင်း လုံခြုံရေးအဖွဲ့နဲ့ နီးစပ်သူတယောက်က ” အဲ့ဒီ ရဲမေ ( စခန်းအခေါ် ဂျက်မ)က ဆိုင်ကယ်နဲ့ လာတဲ့အချိန် ၊ သူ့ဆိုင်ကယ်နောက်က ဆိုင်ကယ်တစီး လိုက်လာပြီး ပစ်သတ်သွားတာပါ ၊ အမှုဖွင့်အရေးယူထားတယ် ” လို့ ပြောပါတယ်။
ပြီးခဲ့တဲ့ အောက်တိုဘာ ၁၀ ရက်နေ့ ညနေပိုင်းက အောင်မြေသာစံခရိုင် ၊ အောင်မြေသာစံမြို့နယ် ၊ အမရဌာနီ အရှေ့( မြောက်ပြင်) ရပ်ကွက် ၉ လမ်းနဲ့ ၇၉ × ၈၀ လမ်းကြားမှာ နယ်ထိန်း ရဲတပ်သား မိုးဆန်းဦး ဆိုသူပစ်သတ်ခံရတယ်လို့ သိရပါတယ်။
ပြီးခဲ့တဲ့ အောက်တိုဘာ ၈ ရက်နေ့ကလည်း အောင်မြေသာစံမြို့နယ်၊ အောင်မြေသာစံရပ်ကွက် ၊ ၁၉ လမ်း၊ ၈၆ × ၈၇ လမ်းကြားရှိ ၊ အောင်မြေသာစံရပ်ကွက် အုပ်ချုပ်ရေးမှူးရုံးရှေ့မှာ ရပ်ကွက်အုပ်ချုပ်ရေးမှုးရုံးအခြေပြု လုံခြုံရေးဆောင် ရွက်ပေးနေတဲ့ လုံခြုံရေးအဖွဲ့က ရဲ တပ်ကြပ်ကြီး တစ်ယောက်လည်း ပစ်သတ်ခံရတယ်လို့ သိရပါတယ်။
အဲ့ဒီ အပြင် ပြီးခဲ့တဲ့ မေလဝန်းကျင်ကလည်း မြစ်ငယ် ရထား ရဲတပ်ဖွဲ့မှာ တာဝန်ကျနေတဲ့ ဒုရဲမှူး တယောက်ဟာ ပုသိမ်ကြီးမြို့နယ်ထဲက မိသားစုအိမ်ကို အလည်သွားရင်း အဲ့ဒီ အိမ်ထဲမှာပဲ ပစ်သတ်ခံရပြီး သေနတ်နဲ့ လက်နက်ခဲယမ်းတွေ ပါသွားတယ်လို့ သိရပါတယ်။
ပြီးခဲ့တဲ့ ၂ နှစ်ကျော်ကာလအတွင်း မန္တလေးတိုင်းမှာ ပစ်သတ်ခံရတဲ့ ရဲတပ်ဖွဲ့ဝင် ၃၀ ဝန်းကျင်ရှိတယ်လို့ သိရပြီး အဲ့ဒီထဲက ဝမ်းတွင်းမြို့မှာ သတင်းရဲတပ်ဖွဲ့တာဝန်ခံ တစ်ဦးအပါအဝင် ရထားရဲတပ်ဖွဲ့ဝင်တွေ ၊ နယ်ထိန်းရဲတွေ ၊ အချုပ်ကား လုံခြုံရေး တာဝန်ကျ ရဲတွေ ပါဝင်တယ်လို့ သိရပါတယ်။
နိုဝင်ဘာ ၁၁ နောက်ပိုင်း တိုက်ပွဲတွေမှာလည်း နယ်က ရဲစခန်းတွေ တိုက်ခိုက်ခံရတာများလာပြီး ရဲတပ်ဖွဲ့ဝင်တွေ သေဆုံးမှု အရေအတွက် တိုးလာနေပါတယ်။
